Allergy & Unpackaged Food Guide for Businesses

Mae'r Asiantaeth Safonau Bwyd (FSA) wedi cyhoeddi canllawiau newydd i helpu busnesau bwyd i gynorthwyo cwsmeriaid sydd angen osgoi cynhwysion penodol oherwydd alergedd bwyd.

 

Anelir y canllawiau at fusnesau sy'n gwerthu bwyd nas pecynnwyd, megis bwytai, caffis, cownteri deli, siopau brechdanau a phoptai.

 

Nid yw'n ofynnol yn ôl y gyfraith i fusnesau bwyd sy'n gwerthu bwyd a baratowyd neu a lapiwyd ar y safle nodi p'un a yw'n cynnwys cynhwysion y gallai fod gan bobl alergedd iddynt, megis cnau, gwenith neu wyau.

 

 

Mae'r canllawiau yn rhan o waith parhaus yr Asiantaeth i helpu busnesau i wella'r wybodaeth a gynigir ganddynt i gwsmeriaid sydd ag alergeddau neu anoddefiadau bwyd.

 

Mae llyfryn a phoster sy'n ategu’r canllawiau yn cael eu hyrwyddo drwy sefydliadau masnach sy'n cynrychioli manwerthwyr, arlwywyr a chyflenwyr arlwyo yn y DU a thrwy swyddogion gorfodi awdurdodau lleol.

 

Mae'r rhain yn rhoi cyngor o ran pa gynhwysion sy'n gallu achosi problemau a sut y dylid ymdrin â chwestiynau cwsmeriaid. Y nod yw cyflwyno'r wybodaeth yn y llyfryn ac ar y poster mewn modd syml sy'n hawdd i'w ddarllen.

 

Dywedodd Sue Hattersley, Pennaeth Polisi Alergedd Bwyd yn yr Asiantaeth Safonau Bwyd: "Mae nifer o fusnesau bwyd eisoes yn dda o ran rhoi gwybod i'w cwsmeriaid os oes unrhyw gynhwysion yn eu bwyd a allai achosi problemau o ran alergeddau.

 

"Fodd bynnag, rydym am i bob busnes allu helpu eu cwsmeriaid sydd ag alergeddau bwyd. Mae angen i'r sawl sy'n paratoi ac yn gweini bwyd wybod am alergeddau bwyd ac am y wybodaeth sydd ei hangen ar gwsmeriaid sydd ag alergeddau bwyd. Mae ein canllawiau newydd, ynghyd â'r llyfryn a'r poster, yn rhoi cyngor defnyddiol i fusnesau a dylent roi hyder ychwanegol i'w cwsmeriaid".

 

RHAGOR O WYBODAETH

 

Am ragor o wybodaeth ac i weld y canllawiau ewch i: www.food.gov.uk/foodindustry/guidancenotes/labelregsguidance/nonprepacked

 

 

Am ragor o wybodaeth am alergeddau ac anoddefiadau bwyd o wefan bwyta'n iach yr Asiantaeth Safonau Bwyd ewch i: www.eatwell.gov.uk/healthissues/foodintolerance